പൈതല്‍മലയും പാലക്കയംതട്ടും പ്രിയം

പൈതല്‍മലയും പാലക്കയംതട്ടും ഒഴികെയുള്ള സ്ഥലങ്ങളില്‍ ജൂണ്‍ മുതല്‍ ഡിസംബര്‍ വരെയാണ് കൂടുതലായും സഞ്ചാരികള്‍ എത്താറുള്ളത്. കണ്ണൂര്‍ ജില്ലയിലെ പ്രധാന ടൂറിസ്റ്റ് കേന്ദ്രമാണ് പൈതല്‍ മല. പൈതല്‍ മല സമുദ്ര നിരപ്പില്‍ നിന്നും 4500 അടി ഉയത്തില്‍ സ്ഥിതി ചെയ്യുന്നു. പൈതല്‍ മലയും അതിന്റെ താഴ് വാരങ്ങളിലുമായി നിരവധി വ്യത്യസ്തങ്ങളായ വിനോദ സഞ്ചാര കേന്ദ്രങ്ങളും കൂട്ടി ചേര്‍ത്ത് ഇപ്പോള്‍ പൈതല്‍ മല ടൂറിസം സഞ്ചാരികള്‍ക്ക് കൂടുതല്‍ ആകര്‍ഷകമായിരിക്കുകയാണ്. പൈതല്‍ മല ട്രക്കിങ് ഇഷ്ടപ്പെടുന്ന സാഹസിക സഞ്ചാരികള്‍ നിരവധിയാണ്. പൈതല്‍ മലയുടെ സമീപത്തായി സ്ഥിതി ചെയ്യുന്ന പാലക്കയം തട്ടാണ് മറ്റൊരു ആകര്‍ഷണ കേന്ദ്രം. കണ്ണൂര്‍ ജില്ലയിലെ പ്രധാന പിക്‌നിക്ക് സ്‌പോട്ട് ആയി മാറിക്കഴിഞ്ഞ പാലക്കയം തട്ട് 3500 അടി ഉയരത്തിലാണ് സ്ഥിതി ചെയ്യുന്നത്.ഏത് പ്രയത്തിലുള്ളവര്‍ക്കും വളരെ അനായാസമായി എത്തിച്ചേരന്‍ സാധിക്കുന്ന ഈ സ്ഥലം നല്ലൊരു ഫാമിലി പിക്‌നിക്ക് സ്‌പോട്ടായി മാറിയിരിക്കുകയാണ്. പാലക്കയം തട്ടിന്റെ മുകളില്‍ വരെ വാഹനങ്ങള്‍ എത്തിച്ചേരും. പൈതല്‍മലയില്‍ ട്രക്കിങ്ങിനും മറ്റ് മഴക്കാല ക്യാംപുകള്‍ക്കുമൊക്കെയായി നിരവധി സഞ്ചാരികള്‍ എത്തിത്തുടങ്ങി. പൈതല്‍മലയിലെ റിസോര്‍ട്ടുകളിലും മണ്‍സൂണ്‍ സീസണ്‍ ആഘോഷിക്കാന്‍ നിരവധി പേരെത്തുന്നുണ്ട്. മഴയും കാറ്റും മഞ്ഞും ആസ്വദിക്കാന്‍ പാലക്കയംതട്ടിലും സഞ്ചാരികളെത്തുന്നുണ്ട്. എന്നാല്‍ മുന്‍വര്‍ഷങ്ങളെ അപേക്ഷിച്ച് പാലക്കയം തട്ടിലെത്തുന്നവരുടെ എണ്ണം ക്രമാതീതമായി കുറഞ്ഞിട്ടുണ്ട്. ഇവിടങ്ങളില്‍ നിരവധി റിസോര്‍ട്ടുകളുടെ പ്രവൃത്തി നടക്കുന്നതിനാല്‍ വിനോദ സഞ്ചാരികള്‍ എത്തുന്നതില്‍ വൈമുഖ്യം കാട്ടുന്നുണ്ട്.

പന്ത്രണ്ടാംചാല്‍ ഐലന്‍സ് സുന്ദരം

പൈതല്‍ മലയില്‍ വരുന്ന സഞ്ചാരികള്‍ക്ക് ശാന്ത സുന്ദരമായ മറ്റൊരു സ്ഥലമാണ് പന്ത്രണ്ടാം ചാല്‍ ഐലന്‍സ്. തടിക്കടവ് പുഴയില്‍, പുഴ പല കൈവഴികളായി പിരിഞ്ഞ് രൂപീകൃതമായ പച്ചതുരുത്തുകള്‍ ആണ് പന്ത്രണ്ടാംചാല്‍ ഐലന്‍സ് എന്ന് അറിയപ്പെടുന്നത്. ചെറു ചെറു ദ്വിപുകള്‍ അതി മനോഹരങ്ങളായ കാഴ്ച്ചകള്‍ ആണ് സമ്മാനിക്കുന്നത്. ഇവിടെ സഞ്ചാരികള്‍ക്ക് അരുവികള്‍ മുറിച്ചുകടന്നു ദ്വീപിലേ തണല്‍ മരങ്ങള്‍ക്കിടയിലൂടെ പ്രകൃതിയിലെ ശാന്തതയില്‍ അലിഞ്ഞു ചേരാന്‍ സാധിക്കും. ഇവിടെയുള്ള പൈതല്‍ കുണ്ട് വെള്ളച്ചാട്ടത്തിന്റെ കാഴ്ച മനോഹരമാണ്.അതുപോലെ റിവര്‍ ട്രക്കിങ്, നാച്ചുറല്‍ വാക്, ബാംബൂ ഫോറസ്റ്റ് ട്രക്കിങ്, നാച്ചുറല്‍ പൂള്‍, പൈതല്‍ മലയുടെ താഴ് വാരങ്ങളില്‍ ഓഫ് റോഡിങ്, നിരവധി ട്രക്കിങ് വഴികള്‍ മുളം ചങ്ങാടവും,കൊട്ടത്തോണി യാത്രയുമെല്ലാം ഇവിടെയുണ്ട്.

വെള്ളച്ചാട്ടങ്ങള്‍ പതഞ്ഞൊഴുകുന്നു

പൈതല്‍മലയുടെ താഴ്വരയിലെ ഏഴരക്കുണ്ട് വെള്ളച്ചാട്ടവും കാഞ്ഞിരക്കൊല്ലിയിലെ അളകാ വെള്ളച്ചാട്ടവും പതഞ്ഞൊഴുകുകയാണ്. ശനി, ഞായര്‍ ദിവസങ്ങളില്‍ ഏഴരക്കുണ്ട്, കാഞ്ഞിരക്കൊല്ലി വെള്ളച്ചാട്ടങ്ങളില്‍ സഞ്ചാരികളുടെ തിരക്കാണ്. കര്‍ക്കടകമാണ് ഇവയുടെ പ്രൗഢകാലം. എന്നാല്‍ എത്തിപ്പെടാനുള്ള ബുദ്ധി മുട്ടും കാട്ടാനപ്പേടിയും ഉരുള്‍പൊട്ടല്‍ ഭീതിയും കാരണം സഞ്ചാരികള്‍ ഇത്തവണ കുറവാണ്. കൂടാതെ, കര്‍ശന നിയന്ത്രണവുമുണ്ട്. നേരത്തേ, മഴക്കാലത്ത് ഇവിടെ സഞ്ചാരികളുടെ കുത്തൊഴുക്കായിരുന്നു. 7 തട്ടുകളിലൂടെ ഒഴുകിയെത്തുന്ന ഏഴരക്കുണ്ട് വെള്ളച്ചാട്ടത്തിന്റെ ശബ്ദം പൊട്ടന്‍പ്ലാവില്‍നിന്നേ കേള്‍ക്കാം. സഞ്ചാരികള്‍ അപകടത്തില്‍ പെടാതെ വെള്ളച്ചാട്ടം ആസ്വദിക്കാനുള്ള സൗകര്യം ഇവിടെ ഒരുക്കിയിട്ടുണ്ട്. കാഞ്ഞിരക്കൊല്ലിയിലെ മനോഹരമായ അളകാ വെള്ളച്ചാട്ടത്തിന്റെ ശബ്ദം കാഞ്ഞിരക്കൊല്ലി ടൗണില്‍ എത്തുമ്പോഴേ കേള്‍ക്കാം. പൈതല്‍മല-പാലക്കയംതട്ട് ഏഴരക്കുണ്ട് വെള്ളച്ചാട്ടം എന്നീ വിനോദസഞ്ചാരകേന്ദ്രങ്ങള്‍ കോര്‍ത്തിണക്കി എല്ലാ ഞായറാഴ്ചകളിലും 'എക്‌സ്‌പോര്‍ മലയോരം വിത്ത് കെ.എസ്.ആര്‍.ടി.സി. എന്നപേരില്‍ ബസ് സര്‍വീസും നിലവിലുണ്ട്. കാട്ടാനയിറങ്ങുന്ന പ്രദേശമാണ് ഇവിടെയെന്ന പ്രചരണവും യാത്രാദുരിതവും അടുത്ത കാലത്തായി സഞ്ചാരികളുടെ വരവിനെ പ്രതികൂലമായി ബാധിച്ചിട്ടുണ്ട്.

പ്രകൃതിഭംഗിയാല്‍ അനുഗ്രഹീതം കുട്ടിപ്പുല്ല്

3000ല്‍ അധികം അടി ഉയരത്തിലുള്ള കുട്ടിപ്പുല്ല് ചോലവനവും കാട്ടരുവിയും പച്ചവിരിച്ച പുല്‍മേടുമായി പ്രകൃതിഭംഗിയാല്‍ അനുഗ്രഹീതമായ ടൂറിസം കേന്ദ്രമാണ്. ജില്ലയിലെ പൈതല്‍മലയും പാലക്കയം തട്ടും കഴിഞ്ഞാല്‍ ഏറെ പ്രിയമുള്ള വിനോദസഞ്ചാര കേന്ദ്രമാണ് കുട്ടിപ്പുല്ല്. കോടമഞ്ഞ് പുതച്ചും പച്ച വിരിച്ചും കുട്ടിപ്പുല്ല് സഞ്ചാരികളെ ആകര്‍ഷിക്കുന്നു. നിരവധി പേരാണ് ഇവിടെ ദിനംപ്രതി ഇവിടെ എത്തിച്ചേരുന്നത്. പൈതല്‍മലയ്ക്കും പാലക്കയംതട്ടിനും ഇടയിലായിട്ടാണ് കുട്ടിപ്പുല്ല്. പൈതല്‍ മലയുടെ പടിഞ്ഞാറന്‍ ചെരിവ് കയ്യെത്തും ദൂരത്തില്‍ കുട്ടിപ്പുല്ലില്‍ നിന്നും കാണാം. കുടിയാന്മല പാത്തന്‍പാറ മൈലംപെട്ടി എന്നീ വഴികളിലൂടെ കുട്ടിപ്പുല്ലിലേക്ക് എത്തിച്ചേരാം. കരുവന്‍ചാല്‍-പാത്തന്‍പാറ വഴിയും കുടിയാന്മല റോഡില്‍ നൂലിട്ടാമല എന്ന സ്ഥലത്തിനടുത്തുനിന്ന് മൂന്ന് കിലോമീറ്റര്‍ ദൂരം യാത്ര ചെയ്താലും ഇവിടെ എത്താം. തളിപ്പറമ്പില്‍നിന്ന് 41 കിലോമീറ്റര്‍ സഞ്ചരിച്ചാല്‍ മലമുകളിലെത്താം. അതുപോലെ കുടിയാന്മലയില്‍ നിന്ന്  കവരപ്ലാവ് വഴി നേരിട്ടും ഇവിടെ എത്തിച്ചേരാം. ഡെസ്റ്റിനേഷന്‍ ചാലഞ്ച് പദ്ധതിയുടെ ഭാഗമായി നടുവില്‍ പഞ്ചായത്ത് തെരഞ്ഞെടുത്ത വിനോദ സഞ്ചാര മേഖല കൂടിയാണിത്. ഡെസ്റ്റിനേഷന്‍ ചലഞ്ച് പദ്ധതിയില്‍ കുട്ടിപ്പുല്ലില്‍ റിസോര്‍ട്ടും പാര്‍ക്കും സ്ഥാപിക്കും.

ജാഗ്രത വേണം
മഴക്കാലത്ത് വെള്ളച്ചാട്ടങ്ങളില്‍ കുളിക്കാനെത്തുന്നവര്‍ സുരക്ഷാ മുന്നറിയിപ്പുകള്‍ അവഗണിക്കരുത്. മദ്യപിച്ചോ മറ്റ് ലഹരി പദാര്‍ഥങ്ങളുപയോഗിച്ചോ വെള്ളച്ചാട്ടത്തില്‍ കുളിക്കാനിറങ്ങരുത്. അപകടപരമായും സാഹസികമായും ഫോട്ടോയും വീഡിയോയും എടുക്കരുത്. കനത്ത മഴയുള്ള സമയങ്ങളില്‍ വെള്ളച്ചാട്ടത്തില്‍ കുളിക്കാനിറങ്ങുന്നതും അപകടമുണ്ടാക്കും. വെള്ളം ശക്തിയായി വീഴുന്നതിന് തൊട്ടുതാഴെ നില്‍ക്കുന്നതും അപകടമാണ്. വെള്ളച്ചാട്ടത്തിന് സമീപത്തെ പാറകളില്‍ പിടിച്ച് താഴേക്ക് ഇറങ്ങാനോ മുകളിലേക്ക് കയറാനോ ശ്രമിക്കരുത്.