പ്ലാനറ്റോറിയം ജില്ലയില്‍ യാഥാര്‍ഥ്യമാക്കും: മുണ്ടേരി ഹയര്‍ സെക്കന്‍ഡറി സ്‌കൂളില്‍ 1.59 കോടിയുടെ ധാരണാപത്രം ഒപ്പുവച്ചു 

Published on 12 February 2020 9:49 pm IST
×

കോഴിക്കോട്: പ്ലാനറ്റോറിയത്തിന്റെ മാതൃകയില്‍ എക്സിബിഷന്‍ സെന്ററും ത്രീഡി തീയേറ്ററും അടങ്ങുന്ന പ്ലാനറ്റോറിയം മുണ്ടേരി ഹയര്‍സെക്കന്‍ഡറി സ്‌കൂളില്‍ യാഥാര്‍ഥ്യമാക്കുമെന്ന് കെ.കെ രാഗേഷ് എം.പി. നാഷണല്‍ മിനറല്‍ ഡെവലപ്പ്മെന്റ് കോര്‍പ്പറേഷനും കൊച്ചിന്‍ ഷിപ്പ്‌യാര്‍ഡും മുണ്ടേരി ഹയര്‍ സെക്കന്‍ഡറി സ്‌കൂളിന് അനുവദിച്ച 1.59 കോടിയുടെ ധാരണാപത്രം ഒപ്പുവെച്ച് സംസാരിക്കുകയായിരുന്നു അദ്ദേഹം. 

അടുത്ത അധ്യായന വര്‍ഷം സ്‌കൂളില്‍ 27 സ്മാര്‍ട്ട് ക്ലാസ്മുറികള്‍ ഉണ്ടാവുമെന്നും അദ്ദേഹം കൂട്ടിച്ചേര്‍ത്തു. മുണ്ടേരി സ്‌കൂളിന്റെ വികസനത്തിന് വേണ്ടിയുള്ള 22-ാമത്തെ ധാരണാപത്രമാണ് ഒപ്പുവെച്ചത്. എം.പിയുടെ ഇടപെടലുകളുടെ ഫലമായി പൊതുമേഖല സ്ഥാപനങ്ങളായ നാഷണല്‍ മിനറല്‍ ഡെവലപ്പ്മെന്റ് കോര്‍പ്പറേഷന്റെയും കൊച്ചിന്‍ ഷിപ്പയാഡിന്റെയും സി.എസ്.ആര്‍ ഫണ്ട് വിനിയോഗിച്ചാണ് സ്‌കൂള്‍ ആധുനികവല്‍ക്കരിക്കുന്നത്. ഓഡിറ്റോറിയം ബ്ലോക്കിന് വേണ്ടി എന്‍.ടി.പി.സി രണ്ടര കോടി രൂപ അനുവദിച്ചതായും എം.പി അറിയിച്ചു. ഇതിനു പുറമെ അന്താരാഷ്ട്ര നിലവാരത്തിലുള്ള ലാബുകളും ഡിജിറ്റല്‍ ലൈബ്രറിയും സ്‌കൂളില്‍ പൂര്‍ത്തിയാവുന്നുണ്ട്. എം.പി ഫണ്ടില്‍ നിന്ന് സ്‌കൂള്‍ ബസ്സിനായി 20 ലക്ഷം രൂപയും അനുവദിച്ചിട്ടുണ്ട്. 

കൂടാതെ കാഞ്ഞിരോട് യു.പി സ്‌കൂളിന്റെ വികസനത്തിനായി ഇന്ത്യന്‍ ഓയില്‍ കോര്‍പറേഷന്‍ 60 ലക്ഷം രൂപ അനുവദിച്ചതായും അദ്ദേഹം പറഞ്ഞു. ആറളം ഫാം സര്‍ക്കാര്‍ ഹയര്‍ സെക്കന്‍ഡറി സ്‌കൂളിന്റെ വികസനത്തിനായി പദ്ധതികള്‍ ആവിഷ്‌കരിച്ചിട്ടുണ്ടെന്നും കെ.കെ രാഗേഷ് എം.പി പറഞ്ഞു. 23 ഏക്കര്‍ ഭൂമി സര്‍ക്കാര്‍ ഇതിനായി നല്‍കിയിട്ടുണ്ട്. കായിക മേഖലയ്ക്ക് പ്രാധാന്യം കൊടുത്തുകൊണ്ടുള്ള പദ്ധതികളാണ് ഇവിടെ വിഭാവനം ചെയ്യുന്നത്.

ജില്ലാ പഞ്ചായത്ത് പ്രസിഡന്റ് കെ.വി സുമേഷ് ചടങ്ങില്‍ അധ്യക്ഷനായി. എന്‍.എം.ഡി.സി സീനിയര്‍ മാനേജര്‍ ബി.എന്‍ ശാംപ്രസാദ്, കൊച്ചിന്‍ ഷിപ്പ്‌യാര്‍ഡ് അസ്സിസ്റ്റന്റ് എ.ജി.എം ശശീന്ദ്ര ദാസ്, ജില്ലാ പഞ്ചായത്ത് സെക്രട്ടറി വി. ചന്ദ്രന്‍, ജില്ലാ പഞ്ചായത്ത് അംഗം കെ. മഹിജ, മുണ്ടേരി ഗ്രാമപഞ്ചായത്ത് പ്രസിഡന്റ് എ. പങ്കജാക്ഷന്‍, മുണ്ടേരി ഗ്രാമപഞ്ചായത്ത് സ്ഥിരം സമിതി അംഗം ആര്‍.കെ പത്മനാഭന്‍, മുണ്ടേരി ഹയര്‍ സെക്കന്‍ഡറി സ്‌കൂള്‍ പ്രധാനാധ്യാപകന്‍ കെ.പി ചന്ദ്രന്‍, ജനപ്രതിനിധികള്‍, ഉദ്യോഗസ്ഥര്‍ എന്നിവര്‍ പങ്കെടുത്തു.
 






സൈബര്‍ നിയമ പ്രകാരം അശ്ലീലവും നിയമ വിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കേണ്ടതാണ്.
വായനക്കാരുടെ അഭിപ്രായങ്ങള്‍ വായനക്കാരുടെത് മാത്രമാണ്.

Related News

Latest News

Loading...please wait